12 korrik 2019, ora 20.30-22.00

Përsëri në Hënë, por me teleskop & Shpërndarja e Certifikatave dhe Çmimeve për pjesëmarrësit në Konkursin Kombëtar të Fizikës “Henrietta Leavitt” / 2019

Nga Mimoza Hafizi

On the moon… again!

Në mëngjesin e 21 Korrikut 1969, astronauti Neil Armstrong, zbriti nga moduli “Eagle” i anijes hapësinore “Apollo 11” dhe, teksa hidhte hapat robotikë mbi truallin hënor, artikuloi mesazhin e famshëm “Një hap i vogël për njeriun, por një kërcim gjigand për njerëzimin”.

Mbi 500 milionë banorë të Tokës po e ndiqnin direkt, përmes televizionit, këtë akt të parë të “pushtimit” të hapësirës nga qytetërimi i tyre.

Pesëdhjetë vjet më vonë, në ditët e korrikut 2019, gjithë bota ka vendosur të përkujtojë 50 vjetorin e zbritjes së njerit të parë në Hënë.

Edhe studentët e Fizikës, të Fakultetit të Shkencave të Natyrës, të Universitetit të Tiranës, ju ftojnë t’u bashkoheni nismës së tyre, me mesazhin:

Përsëri në Hënë – por me teleskop!

Bashkohuni me ta, në sheshin Skënderbej, sonte datë 12 Korrik, ora 20.30, sepse duan t’ju ofrojnë instrumentat dhe dijet e tyre.

Le ta vëzhgojmë së bashku Hënën, me teleskopin tonë apo me instrumentet e secilit prej jush. Të shohim së bashku “Detin e Qetësisë” hënore, ku Armstrong dhe Aldrin zbritën për herë të parë, të shqyrtojmë relievin e satelitit tonë, si dhe vendet e zbarkimit të misioneve pasuese. 12 burra kanë vajtur në Hënë në shekullin e kaluar. Njerëzit po përgatiten për të zbarkuar në Mars.

 

Le të shohim edhe yllin e Shqipërisë me planetin e vet rrotull. Çfarë është ky yll? Le ta zbulojmë së bashku sonte, me shpresën për një qiell të hapur.

 

Foto nga aktiviteti zhvilluar në Sheshin “Skënderbe”, dt. 12 korrik 2019, ora 20.30, Tiranë Fondacioni “Henrieeta Leavitt” & Fakulteti i Shkencave të Natyrës, Universiteti  i Tiranës